| اساتذہ کسی بھی معاشرے کی فکری تشکیل میں اہم کرداراداکرتے ہیں ۔ نسل نوکی تشکیل شخصیت میں والدین کے بعداستاد ہی ہے جو جلوہ گرہوتاہے ۔ان خیالات کا اظہار ممتازنقادافسانہ نگار اور استاد پروفیسرڈاکٹر ناصر عباس نیر کے اعزاز میں منعقدہ ایک تقریب سے خطاب کرتے ہوئے مقررین نے کیا ۔ادارہ تالیف و ترجمہ پنجاب یونیورسٹی لاہور کے زیر انتظام اردو ادب کے معروف مصنف ،محقق، تخلیق کار ،اور نقاد پروفیسر ڈاکٹر ناصر عباس نئیر کی اپنے تدریسی منصب سے سبکدوشی کے موقع پر اس تقریب کا اہتمام کیا گیا۔ اس تقریب کی صدارت معروف شاعر، محقق اور عالم ڈاکٹر خورشید رضوی نے کی۔ مہمان مقررین میں ڈاکٹر اشفاق احمدورک،ڈاکٹرنجیب جمال،ڈاکٹر شاہ زیب خان ،ڈاکٹرخالد محمود سنجرانی ،ڈاکٹر اورنگزیب نیازی،ابق بیورکریٹ اور مصنف رانا محبوب اختر اور ترکی سے آئے ہوئے نوجوان اسکالر محمد حذیفہ، شامل تھے اس تقریب کی نظامت کے فرائض غلام علی(متعلم، بی ایس اردو) نے انجام دیے۔ تقریب کا باقاعدہ آغاز تلاوت کلام پاک سے ہوا۔ جس کے بعد بارگاہ رسالت ماب میں ہدیہ نعت پیش کیا گیا۔ تلاوت نعمان علی اور نعت جشن عباس نے پیش کی۔ |
